Na Chocolataria, chocolate.

Assim de doce foi o nosso aniversário, festejando com Marful a saída do seu disco na apresentaçom à imprensa desta manhám, na Chocolataria de Santiago de Compostela.
Ali estivêrom, acompanhados e acompanhada de Xurxo Souto, que é desde já um sócio mais deste clube de fans.
Falárom do disco, da inspiraçom nesses salons de baile que tam bem conhecemos, das festas da Caniça gravadas por Indalécio Pascual -tio dos irmaos Pascual-, do concerto do 16 de Junho no Auditório, dos colaboradores... E também soou a música, em directo, sem amplificar, como se nos estivessem dedicando o "Tris Tras" pessoalmente a cada uma das assistentes.


Acompanhadas da imprensa e das amigas, ali estavam o Quim Farinha e o Guillerme Fernández, colaboradores do disco. E como nom, estas fans que aqui escrevem.
Na mesa, o sifom que pode ser de qualquer de vós se respondedes acertadamente às perguntas deste sorteio, do que já tedes muitas pistas e no qual ainda estades a tempo de participar. Embora fóssemos fazer a entrega neste mesmo dia, decidimos adiá-la para dar-vos mais oportunidades de participar. Assim de bonito é:


As imagens som, como habitualmente, da Luzinha.

Aniversário

Estamos de aniversário!!!!!!!!! Um ano já na rede, um ano na rua, nos concertos, no disco, um ano com vós, com nós e, como nom, com Marful. Ajudade-nos a festejá-lo e enviade ideias, fotos, textos, qualquer cousa com a que comemorar este ano de clube de fans, sempre ao nosso endereço habitual: (clubedefansmarful@sapo.pt)
E já sabedes, nom perdades de vista esta página porque ainda nos ficam muitas surpreesas que oferecer.

Apresentaçom do disco à imprensa

MARFUL
presenta o seu primeiro disco.
Será este mércores 31 de maio, ás 12h,
na Chocolataría (rúa Orfas) de Compostela.
Esta presentación é para medios de comunicación.

O público en xeral terá a oportunidade de velos en directo o vindeiro 16 de xuño,
en Compostela tamén,
no ciclo Sons da Diversidade.

Para máis información:

Abada Xestión Cultural
Vía Pasteur, 5-2º A - Políg. do Tambre
15890 Santiago de Compostela
tlf/fax. (+34) 981 576 574
info@abada.es
http://www.abada.es

Concerto em Ponte Vedra

Temos outra vez a oportunidade de ver aos Marful em directo. Mais uma vez em Ponte Vedra, agora no salom de actos da Faculdade de Belas Artes. Será a terça-feira, 29 de Maio às 19:00 horas.

Pablo Pascual e Marcos Teira na rádio galega

Esta vez som o Pablo e o Marcos os que poderemos escutar na rádio galega. Será o próximo sábado 27 de Maio, às 16:00 horas, no programa Lume na palheira de Emilio Españadero.
Outro momento que nom devemos perder, como sempre, estaremos atentas.

Mais uma crónica jornalística

Esta vez foi no Faro de Vigo, sexta-feira 19 de Maio, e está assinada por Salvador Rodríguez.

Customiza-te com Marful

Desde este próximo fim de semana encontrarás na cidade de Santiago de Compostela estes bonitos crachás do CD-Marful:



Se nom estás nesta cidade ou nom podes chegar, podes enviar-nos um correio ao nosso endereço habitual: clubedefansmarful@sapo.pt, e podemos combinar contigo para fazer-che chegar uma.

Em "A Nosa Terra"

Esta vez foi em A Nosa Terra onde lhe dedicaram um espaço ao primeiro disco de Marful. E ali, mençom especial a este especial clube de fans, mesmo com referência à identidade da presidência (esta fam_namber_güam duvida nom entanto dessa informaçom :-).


Tivemos também notícias de que o concerto de Lisboa fora um autêntico êxito, e aqui deixamos essa referência enquanto esperamos por crónica mais detalhada e alguma fotografia.

Sorteio muito especial 2

Como as perguntas deste sorteio especial parecêrom difíceis de mais para alguma das fans marfulianas despistadas, aqui vam algumas pistas para ajudar-vos.

1. O superpolo foi criado por um artista e desenhador que está envolvido também no projecto de Aduaneiros sem fronteiras.
2. O nome do primeiro guitarrista começa por Mi.
3. A letra da única cançom em francês do disco... bem, essa é fácil de encontrar.
4. As fotos fôrom feitas em lugares muito relacionadas com a inspiraçom da música de Marful.
5. E o mecanismo do sifom..., essa também vo-la deixo para a vossa investigaçom.

Já sabedes que o prémio é um desses fantásticos sifons que aparecem na capa do disco e assinado por toda e todos os marfules.

Mais entrevistas

Esta vez a entrevista é só com Ugia e sai publicada no Portal Galego da Língua. Que a desfrutedes!!!!!!!!

Ugia em concerto

Esta vez nom é com Marful mas com Nordestinas. Na Universidade da Corunha, no Paraninfo da Reitoria, às 21:00 horas de hoje mesmo. Tentaremos estar ali para desfrutá-lo.

Mais Marful nos jornais.

Esta vez é em La Opinión de A Corunha. Assina Óscar Losada um artigo com declaraçons da banda.

Ali, declaraçons como esta:

"O momento para editar a obra é bo", sinala Pedro Pascual, o acordeonista da formación, "e sobre todo porque fomos madurando a idea sen mutilar o entusiasmo polo repertorio, ao que lle fomos incorporando nalgunha peza algún arranxo diferente".

Ou comentários como este:

A banda mergúllase no seu repertorio na recreación de temas, con arranxos nados no maxín da banda, que eran interpretados nos anos 30 e 40 do século pasado nos salóns de baile que existían pola xeografía galega, onde pairaba unha presenza de sons que tiñan a súa orixe en América. "Esa é a nosa gran fonte de inspiración, aínda que temos tamén outras pequenas influenzas.A xente ía a bailar a eses salóns, que foron durante moitos anos da vida cotián en localidade galegas como unha banada sonora constante. Hoxe hai xente que non sabe do que falamos cando comentamos o que acontecía nos salóns de baile, os lugares onde os seua avós se divertían, pero que se descoñecen, xa que estamos máis volcados nas melodías tradicionais Os salóns de baile que existiron por Galicia adiante están xa abandonados, ou recicláronse para dar cabida a outros negocios. Estamos a falar dunha música esquecida e esa vía musical tan descoñecida ten cousas que están moi ben".

Primeiro aniversário

Embora levemos muitos mais anos sendo fans de Marful, e embora este clube de fans nom aparecesse na rede até 31 de Maio de 2005, hoje estamos de aniversário. Porque foi apartir deste concerto em Ponte Vedra quando as presis, vice-presis, secretárias e outros cargos de importância, começamos a imaginar esta possibilidade. Quinze dias depois nasceu, mas hoje é o aniversário da conceiçom.

Nos jornais

Pois além de poder escutar as entrevistas na rádio, também podemos encontrar Marful polas páginas dos jornais galegos. Como nom fomos capazes de gravar a entrevista das Quimbambas (o que é uma lástima pois foi uma entrevista muito bonita e para nós, membros deste clube de fans, emotiva e acorante -como sempre, conseguem pôr-nos vermelhinhas-), deixamos-vos aqui o artigo-reportagem que fai Santiago Jaureguizar no Progreso, a 9 de Maio.

Tema do dia

Na página do Conselho da Cultura, o tema do dia 10 de maio foi dedicado à música galega. Como nom pode ser menos, sai referenciado Marful e assim também sabemos que no mês de janeiro, todo um tema do dia foi dedicado a eles.

Sorteio muito especial

Hoje no Clube temos uma muito boa notícia para todas e todos os fans de Marful. Vamos dispor dum dos sifons da capa do disco assinado por cada um/a dos membros do grupo para sortear entre as pessoas que respondam acertadamente às seguintes perguntas:

1. Quem criou o superpolo ou, dito doutra maneira, de que ovo nasceu?
2. Qual é o nome do primeiro guitarrista do grupo?
3. Quem compujo a letra da única cançom em francês do disco?
4. Onde se figêrom as fotos que aparecem no CD?
5. Quem inventou o mecanismo do sifom?

Começa já a investigar e manda-nos as respostas ao nosso endereço habitual: clubedefansmarful@sapo.pt. Deves enviá-las antes do 20 de Maio e entre as pessoas que respondades bem, faremos o sorteio. O presente entregará-se, se pode ser, no acto de apresentaçom à imprensa do disco, na Chocolatoria de Santiago de Compostela.
Todas a jogar.

Marful na rádio galega

ERRATAS.
Sem que serva de precedente, o clube de fans estava mal informado. Portanto, deixamos aqui a correcçom do erro: nom foi hoje às 12:00 horas, será de tarde, às 15:00 horas, no Diário cultural de Ana Romaní.

Vamos ter a oportunidade de escutar duas entrevistas a Marful. Será na quarta-feira às 12:00 horas no programa "Um dia por diante" e a sexta-feira às 19:00 horas no programa "As quimbambas".
Que vostedes o desfrutem!!

Próximos concertos

O nosso próximo encontro com Marful em concerto será em Lisboa. O 20 de Maio, às 19:00 horas na Biblioteca Museu República e Ressistência (Estrada de Benfica, 419).
Esta fam_namber_güam desejaria estar ali, desfrutar doutro concerto de Marful numa cidade que adora; mas nom vai poder ser. Por isso, agradecerá a quem poda deslocar-se que envie crónica do evento (com fotografias se for possível :-). Já sabedes, ao endereço de sempre: clubedefansmarful@sapo.pt

Já estám aqui

E se pinta assim de bonito por fora já podedes imaginar como é o conteúdo!! Para desfrutar com todos os sentidos.

Por se fora pouco, temos ainda mais história sobre os protagonistas da capa do disco: os sifons. Uns sifons do Baile de Toñito de Rua, em Sargadelos, de nome "La viveirense". Uns sifons que Ugia, que colecciona sifons desde há um tempo, encontra nesse baile enquanto Toñito e o seu pai falam de velhos tempos. Encontra uma caixa inteira de sifons vermelhos e dela tira dous, coloca-os acima do balcom como se se deram um beijo e Fernando Fuentes fotografia-os nesse beijo. Um disparo que ocupa a cabeça de ambos todo o resto do dia e parte da noite, e que sabem que vam ser a capa do disco.